ਚੰਡੀਗੜ੍ਹ ਸਥਿਤ ਉੱਤਰੀ ਭਾਰਤ ਦੇ ਪ੍ਰਮੁੱਖ ਮੈਡੀਕਲ ਸੰਸਥਾਨ PGIMER ਵਿੱਚ ਤਕਨੀਕੀ ਕੈਡਰਾਂ ਦੀ ਰੀਸਟਰਕਚਰਿੰਗ ਅਤੇ ਤਰੱਕੀ ਪ੍ਰਕਿਰਿਆ ਨੂੰ ਲੈ ਕੇ ਨਵਾਂ ਵਿਵਾਦ ਖੜ੍ਹਾ ਹੋ ਗਿਆ ਹੈ। ਪੀਜੀਆਈ ਪ੍ਰਸ਼ਾਸਨ ਨੇ ਹਾਲ ਹੀ ਵਿੱਚ ਲੈਬ, ਐਕਸ-ਰੇ ਅਤੇ ਰੇਡੀਓਥੈਰੇਪੀ ਕੈਡਰ ਰਿਵਿਊ ਪੂਰਾ ਕਰਨ ਦਾ ਦਾਅਵਾ ਕਰਦੇ ਹੋਏ ਇਸਨੂੰ ਇਤਿਹਾਸਕ ਕਦਮ ਦੱਸਿਆ ਸੀ। ਪ੍ਰਸ਼ਾਸਨ ਮੁਤਾਬਕ 30 ਸਾਲਾਂ ਤੋਂ ਲਟਕੀਆਂ ਫਾਈਲਾਂ ਦਾ ਨਿਪਟਾਰਾ ਕਰਕੇ 659 ਕਰਮਚਾਰੀਆਂ ਨੂੰ ਕੁੱਲ 1120 ਤਰੱਕੀਆਂ ਦਿੱਤੀਆਂ ਗਈਆਂ ਹਨ।

ਪ੍ਰਸ਼ਾਸਨ ਦੇ ਅੰਕੜਿਆਂ ਅਨੁਸਾਰ ਲੈਬ ਕੈਡਰ ਵਿੱਚ 899, ਐਕਸ-ਰੇ ਕੈਡਰ ਵਿੱਚ 173 ਅਤੇ ਰੇਡੀਓਥੈਰੇਪੀ ਕੈਡਰ ਵਿੱਚ 48 ਤਰੱਕੀਆਂ ਦਿੱਤੀਆਂ ਗਈਆਂ। PGI ਡਾਇਰੈਕਟਰ ਪ੍ਰੋ. ਵਿਵੇਕ ਲਾਲ ਨੇ ਇਸਨੂੰ ਕਰਮਚਾਰੀਆਂ ਦੇ ਸਨਮਾਨ ਅਤੇ ਕਰੀਅਰ ਨਾਲ ਜੁੜਿਆ ਵੱਡਾ ਫੈਸਲਾ ਕਰਾਰ ਦਿੱਤਾ।

ਕਰਮਚਾਰੀਆਂ ਨੇ ਚੁੱਕੇ ਗੰਭੀਰ ਸਵਾਲ

ਦੂਜੇ ਪਾਸੇ Association of Radiation Therapists ਨੇ ਪ੍ਰਸ਼ਾਸਨ ਦੇ ਦਾਵਿਆਂ ‘ਤੇ ਸਵਾਲ ਖੜ੍ਹੇ ਕਰ ਦਿੱਤੇ ਹਨ। ਐਸੋਸੀਏਸ਼ਨ ਦਾ ਕਹਿਣਾ ਹੈ ਕਿ ਕੈਡਰ ਰਿਵਿਊ ਅਜੇ ਅਧੂਰਾ ਹੈ ਅਤੇ ਕਈ ਮੁੱਢਲੇ ਮਸਲੇ ਅਜੇ ਵੀ ਹੱਲ ਨਹੀਂ ਹੋਏ।

ਕਰਮਚਾਰੀਆਂ ਦੇ ਅਨੁਸਾਰ ਜਦ ਤੱਕ ਸਾਰੇ ਮਨਜ਼ੂਰਸ਼ੁਦਾ ਅਹੁਦੇ ਬਣਾਏ ਨਹੀਂ ਜਾਂਦੇ, ਭਰਤੀ ਨਿਯਮਾਂ ਵਿੱਚ ਸੋਧ ਨਹੀਂ ਹੁੰਦੀ, ਪਲੇਸਮੈਂਟ ਆਰਡਰ ਜਾਰੀ ਨਹੀਂ ਹੁੰਦੇ ਅਤੇ ਰੁਕੇ ਹੋਏ ਵਿੱਤੀ ਲਾਭ ਕਰਮਚਾਰੀਆਂ ਤੱਕ ਨਹੀਂ ਪਹੁੰਚਦੇ, ਤਦ ਤੱਕ ਇਸ ਪ੍ਰਕਿਰਿਆ ਨੂੰ “ਇਤਿਹਾਸਕ” ਨਹੀਂ ਕਿਹਾ ਜਾ ਸਕਦਾ।

ਸੀਨੀਅਰਟੀ ਲਿਸਟ ‘ਤੇ ਸਭ ਤੋਂ ਵੱਡਾ ਵਿਵਾਦ

ਵਿਵਾਦ ਦਾ ਮੁੱਖ ਕੇਂਦਰ 2020 ਵਿੱਚ ਜਾਰੀ ਕੀਤੀ ਗਈ ਸੀਨੀਅਰਟੀ ਲਿਸਟ ਹੈ। ਐਸੋਸੀਏਸ਼ਨ ਦਾ ਦੋਸ਼ ਹੈ ਕਿ ਰੇਡੀਓਥੈਰੇਪੀ ਕੈਡਰ ਵਿੱਚ ਉਹਨਾਂ ਕਰਮਚਾਰੀਆਂ ਨੂੰ ਵੀ ਉੱਪਰ ਰੱਖਿਆ ਗਿਆ ਜੋ ਅਸਲ ਵਿੱਚ ਇਸ ਕੈਡਰ ਦੇ ਮੈਂਬਰ ਨਹੀਂ ਸਨ।

ਕਰਮਚਾਰੀਆਂ ਦਾ ਕਹਿਣਾ ਹੈ ਕਿ ਡਿਪਿਊਟੇਸ਼ਨ ‘ਤੇ ਕੰਮ ਕਰਨ ਅਤੇ ਕਿਸੇ ਕੈਡਰ ਦਾ ਸਥਾਈ ਮੈਂਬਰ ਹੋਣ ਵਿੱਚ ਵੱਡਾ ਫਰਕ ਹੁੰਦਾ ਹੈ। ਜੇਕਰ ਕੈਡਰ ਬਦਲਿਆ ਗਿਆ ਹੈ ਤਾਂ ਉਸਦੇ ਸਾਰੇ ਦਸਤਾਵੇਜ਼ ਜਨਤਕ ਕੀਤੇ ਜਾਣੇ ਚਾਹੀਦੇ ਹਨ।

“ਗਾਇਬ” ਅਹੁਦਿਆਂ ਨੂੰ ਲੈ ਕੇ ਵੀ ਚਿੰਤਾ

ਐਸੋਸੀਏਸ਼ਨ ਨੇ ਦਾਅਵਾ ਕੀਤਾ ਕਿ ਕੈਡਰ ਰਿਵਿਊ ਦੌਰਾਨ ਕਈ ਇਤਿਹਾਸਕ ਅਤੇ ਤਕਨੀਕੀ ਅਹੁਦੇ ਗਾਇਬ ਕਰ ਦਿੱਤੇ ਗਏ ਹਨ। ਇਨ੍ਹਾਂ ਵਿੱਚ Senior Technical Officer, Dosimetrist, Technical Supervisor, Radium Technologist ਅਤੇ Mold Room Technologist ਵਰਗੇ ਅਹੁਦੇ ਸ਼ਾਮਲ ਹਨ।

ਕਰਮਚਾਰੀਆਂ ਦਾ ਕਹਿਣਾ ਹੈ ਕਿ ਜੇਕਰ ਉੱਚ ਅਹੁਦੇ ਘੱਟ ਕਰ ਦਿੱਤੇ ਜਾਣਗੇ ਤਾਂ ਭਵਿੱਖ ਵਿੱਚ ਤਰੱਕੀ ਦੇ ਮੌਕੇ ਵੀ ਘੱਟ ਹੋ ਜਾਣਗੇ ਅਤੇ ਕਰਮਚਾਰੀਆਂ ਦਾ ਕਰੀਅਰ ਠੱਪ ਹੋ ਜਾਵੇਗਾ।

ਐਸੋਸੀਏਸ਼ਨ ਨੇ ਮੰਗੇ 5 ਸਵਾਲਾਂ ਦੇ ਜਵਾਬ

ਐਸੋਸੀਏਸ਼ਨ ਨੇ ਪ੍ਰਸ਼ਾਸਨ ਕੋਲੋਂ ਲਿਖਤੀ ਰੂਪ ਵਿੱਚ ਕਈ ਸਵਾਲਾਂ ਦੇ ਜਵਾਬ ਮੰਗੇ ਹਨ, ਜਿਨ੍ਹਾਂ ਵਿੱਚ ਸੀਨੀਅਰਟੀ ਲਿਸਟ ਦੀ ਵੈਧਤਾ, ਬਾਹਰੀ ਕਰਮਚਾਰੀਆਂ ਨੂੰ ਕੈਡਰ ਵਿੱਚ ਸ਼ਾਮਲ ਕਰਨ ਦਾ ਅਧਾਰ, ਅਸਲ ਮਨਜ਼ੂਰਸ਼ੁਦਾ ਅਹੁਦਿਆਂ ਦੀ ਗਿਣਤੀ ਅਤੇ ਪੁਰਾਣੇ ਅਹੁਦਿਆਂ ਦੀ ਮੌਜੂਦਾ ਸਥਿਤੀ ਸ਼ਾਮਲ ਹੈ।

ਐਸੋਸੀਏਸ਼ਨ ਦੀ ਪ੍ਰਧਾਨ ਮਨੋਰਮਾ ਸ਼ਰਮਾ ਨੇ ਕਿਹਾ ਕਿ ਕਈ ਮਹੱਤਵਪੂਰਨ ਹੁਕਮ ਅਜੇ ਵੀ ਜਾਰੀ ਹੋਣੇ ਬਾਕੀ ਹਨ। ਉਨ੍ਹਾਂ ਮੁਤਾਬਕ ਕੈਡਰ ਰਿਵਿਊ ਨੂੰ ਪੂਰੀ ਤਰ੍ਹਾਂ ਮੁਕੰਮਲ ਦੱਸਣਾ ਹਕੀਕਤ ਤੋਂ ਪਰੇ ਹੈ।

ਹੁਣ ਸਭ ਦੀਆਂ ਨਜ਼ਰਾਂ ਪ੍ਰਸ਼ਾਸਨ ‘ਤੇ

ਇੱਕ ਪਾਸੇ PGI ਪ੍ਰਸ਼ਾਸਨ 30 ਸਾਲ ਪੁਰਾਣਾ ਬੈਕਲਾਗ ਖਤਮ ਕਰਨ ਦਾ ਦਾਅਵਾ ਕਰ ਰਿਹਾ ਹੈ, ਦੂਜੇ ਪਾਸੇ ਕਰਮਚਾਰੀ ਆਪਣੇ ਹੱਕਾਂ, ਸੀਨੀਅਰਟੀ ਅਤੇ ਵਿੱਤੀ ਲਾਭਾਂ ਲਈ ਅਜੇ ਵੀ ਸੰਘਰਸ਼ ਕਰ ਰਹੇ ਹਨ। ਮਾਹਿਰਾਂ ਦਾ ਮੰਨਣਾ ਹੈ ਕਿ ਇਸ ਵਿਵਾਦ ਦਾ ਹੱਲ ਸਿਰਫ਼ ਪਾਰਦਰਸ਼ਤਾ ਅਤੇ ਖੁੱਲ੍ਹੇ ਸੰਵਾਦ ਰਾਹੀਂ ਹੀ ਸੰਭਵ ਹੈ।