ਚੰਡੀਗੜ੍ਹ ਪ੍ਰੀਮੀਅਰ ਲੀਗ (CPL) 2026 ਤੋਂ ਪਹਿਲਾਂ BCCI ਦੀ ਐਂਟੀ ਕਰਪਸ਼ਨ ਯੂਨਿਟ (ACU) ਵੱਲੋਂ ਖਿਡਾਰੀਆਂ, ਸਪੋਰਟ ਸਟਾਫ ਅਤੇ ਫ੍ਰੈਂਚਾਈਜ਼ੀ ਮਾਲਕਾਂ ਲਈ ਇੱਕ ਖਾਸ ਜਾਗਰੂਕਤਾ ਸੈਸ਼ਨ ਕਰਵਾਇਆ ਗਿਆ। ਇਸ ਸੈਸ਼ਨ ਦਾ ਮਕਸਦ ਕ੍ਰਿਕਟ ਵਿੱਚ ਪਾਰਦਰਸ਼ਤਾ ਅਤੇ ਇਮਾਨਦਾਰੀ ਨੂੰ ਬਰਕਰਾਰ ਰੱਖਣਾ ਸੀ।
ਇਸ ਸੈਸ਼ਨ ਨੂੰ BCCI ACU ਦੇ ਸੀਨੀਅਰ ਇਨਵੈਸਟਿਗੇਸ਼ਨ ਅਧਿਕਾਰੀ ਰਵੀੰਦਰ ਦੋਇਫੋੜੇ, ACU ਮੈਨੇਜਰ ਆਰਕੇ ਸਿੰਘ ਅਤੇ ਪ੍ਰਭਾਕਰ ਬਰਕੀ ਨੇ ਸੰਬੋਧਨ ਕੀਤਾ। ਇਹ ਅਧਿਕਾਰੀ ਪਹਿਲਾਂ ਮੁੰਬਈ ਪੁਲਿਸ ਵਿੱਚ ਵੀ ਉੱਚ ਅਹੁਦਿਆਂ ‘ਤੇ ਸੇਵਾ ਨਿਭਾ ਚੁੱਕੇ ਹਨ।
ਅਧਿਕਾਰੀਆਂ ਨੇ ਖਿਡਾਰੀਆਂ ਨੂੰ ਸੱਟੇਬਾਜ਼ੀ ਨੈੱਟਵਰਕ, ਬੁੱਕੀਆਂ ਅਤੇ ਬਾਹਰੀ ਤੱਤਾਂ ਤੋਂ ਸਾਵਧਾਨ ਰਹਿਣ ਲਈ ਕਿਹਾ, ਜੋ ਮੈਚਾਂ ਦੇ ਨਤੀਜੇ ਪ੍ਰਭਾਵਿਤ ਕਰਨ ਦੀ ਕੋਸ਼ਿਸ਼ ਕਰ ਸਕਦੇ ਹਨ। ਉਨ੍ਹਾਂ ਨੇ ਖਿਡਾਰੀਆਂ ਨੂੰ ਸੋਸ਼ਲ ਮੀਡੀਆ, ਫੋਨ ਕਾਲ ਜਾਂ ਗੈਰ-ਰਸਮੀ ਗੱਲਬਾਤ ਰਾਹੀਂ ਸੰਵੇਦਨਸ਼ੀਲ ਜਾਣਕਾਰੀ ਸਾਂਝੀ ਕਰਨ ਦੇ ਖਤਰੇ ਬਾਰੇ ਵੀ ਚੇਤਾਵਨੀ ਦਿੱਤੀ।
ਸੈਸ਼ਨ ਦੌਰਾਨ ਦੇਸ਼ ਅਤੇ ਵਿਦੇਸ਼ ਦੇ ਕ੍ਰਿਕਟ ਨਾਲ ਜੁੜੇ ਅਸਲੀ ਕੇਸ ਸਟਡੀਜ਼ ਵੀ ਸਾਂਝੇ ਕੀਤੇ ਗਏ, ਜਿਨ੍ਹਾਂ ਰਾਹੀਂ ਖਿਡਾਰੀਆਂ ਨੂੰ ਸਮਝਾਇਆ ਗਿਆ ਕਿ ਭ੍ਰਿਸ਼ਟਾਚਾਰ ਦੇ ਯਤਨ ਕਿਵੇਂ ਸਾਹਮਣੇ ਆਉਂਦੇ ਹਨ ਅਤੇ BCCI ਅਤੇ ਪੁਲਿਸ ਇਸ ‘ਤੇ ਕਿਵੇਂ ਕਾਰਵਾਈ ਕਰਦੇ ਹਨ।
ਇਸ ਮੌਕੇ UTCA ਦੇ ਸਕੱਤਰ ਹਰੀ ਸਿੰਘ ਖੁਰਾਣਾ ਨੇ ਕਿਹਾ ਕਿ ਕ੍ਰਿਕਟ ਦੀ ਭਰੋਸੇਯੋਗਤਾ ਬਰਕਰਾਰ ਰੱਖਣਾ ਬਹੁਤ ਜ਼ਰੂਰੀ ਹੈ। ਉਨ੍ਹਾਂ ਕਿਹਾ ਕਿ BCCI ਦੀ ਐਂਟੀ ਕਰਪਸ਼ਨ ਯੂਨਿਟ ਵੱਲੋਂ ਦਿੱਤਾ ਗਿਆ ਮਾਰਗਦਰਸ਼ਨ ਖਿਡਾਰੀਆਂ ਨੂੰ ਜ਼ਿੰਮੇਵਾਰ ਅਤੇ ਸਾਵਧਾਨ ਬਣਾਉਣ ਵਿੱਚ ਕਾਫੀ ਮਦਦਗਾਰ ਸਾਬਤ ਹੋਵੇਗਾ।
