ਪੰਜਾਬ ਯੂਨੀਵਰਸਿਟੀ (ਪੀਯੂ) ਨੇ ਅਕਾਦਮਿਕ ਸੈਸ਼ਨ 2026-27 ਲਈ ਅਰਥਸ਼ਾਸਤਰ ਵਿਭਾਗ ਵਿੱਚ ਵੱਖ-ਵੱਖ ਡਿਗਰੀ ਕੋਰਸਾਂ ਲਈ ਦਾਖਲਾ ਪ੍ਰਕਿਰਿਆ ਸ਼ੁਰੂ ਕਰ ਦਿੱਤੀ ਹੈ। ਯੋਗ ਉਮੀਦਵਾਰਾਂ ਤੋਂ ਅਰਜ਼ੀਆਂ ਮੰਗੀਆਂ ਗਈਆਂ ਹਨ। ਵਿਭਾਗ ਵੱਲੋਂ ਚਾਰ ਸਾਲਾ ਅੰਡਰਗ੍ਰੈਜੂਏਟ ਪ੍ਰੋਗਰਾਮ ਤਹਿਤ ਬੀਏ (ਆਨਰਜ਼) ਅਤੇ ਬੀਏ (ਆਨਰਜ਼ ਵਿਦ ਰਿਸਰਚ) ਇਨ ਅਰਥਸ਼ਾਸਤਰ ਦੇ ਨਾਲ-ਨਾਲ ਪੋਸਟ ਗ੍ਰੈਜੂਏਟ ਪੱਧਰ ‘ਤੇ ਐਮਏ ਅਰਥਸ਼ਾਸਤਰ ਵਿੱਚ ਦਾਖਲੇ ਦਿੱਤੇ ਜਾਣਗੇ।

ਐਮਏ ਅਰਥਸ਼ਾਸਤਰ ਵਿੱਚ ਦਾਖਲਾ ਲੈਣ ਦੇ ਇੱਛੁਕ ਵਿਦਿਆਰਥੀਆਂ ਲਈ ਪੀਯੂ-ਸੀਈਟੀ ਪੋਸਟ ਗ੍ਰੈਜੂਏਟ ਪ੍ਰੀਖਿਆ ਲਈ ਰਜਿਸਟ੍ਰੇਸ਼ਨ ਦੀ ਆਖਰੀ ਮਿਤੀ 9 ਜੂਨ 2026 ਨਿਰਧਾਰਤ ਕੀਤੀ ਗਈ ਹੈ। ਇਸ ਕੋਰਸ ਲਈ ਕੁੱਲ 80 ਸੀਟਾਂ ਹਨ। ਇਸ ਤੋਂ ਇਲਾਵਾ 5 ਐਨਆਰਆਈ ਅਤੇ 4 ਵਿਦੇਸ਼ੀ ਵਿਦਿਆਰਥੀਆਂ ਲਈ ਵਾਧੂ ਸੀਟਾਂ ਵੀ ਉਪਲਬਧ ਹਨ।

ਅਰਥਸ਼ਾਸਤਰ ਵਿੱਚ ਬੀਏ (ਆਨਰਜ਼) ਜਾਂ ਘੱਟੋ-ਘੱਟ 50 ਫੀਸਦੀ ਅੰਕਾਂ ਨਾਲ ਬੀਏ ਵਿੱਚ ਅਰਥਸ਼ਾਸਤਰ ਵਿਸ਼ੇ ਵਾਲੇ ਵਿਦਿਆਰਥੀ ਇਸ ਕੋਰਸ ਲਈ ਯੋਗ ਹਨ। ਸਾਰੀਆਂ ਸੀਟਾਂ ‘ਤੇ ਦਾਖਲਾ ਪੀਯੂ-ਸੀਈਟੀ ਪੋਸਟ ਗ੍ਰੈਜੂਏਟ ਪ੍ਰੀਖਿਆ ਦੀ ਮੇਰਿਟ ਦੇ ਆਧਾਰ ‘ਤੇ ਕੀਤਾ ਜਾਵੇਗਾ।

ਦੂਜੇ ਪਾਸੇ ਬੀਏ (ਆਨਰਜ਼) ਅਤੇ ਬੀਏ (ਆਨਰਜ਼ ਵਿਦ ਰਿਸਰਚ) ਕੋਰਸ ਵਿੱਚ ਵਿਦਿਆਰਥੀਆਂ ਨੂੰ ਕਈ ਨਿਕਾਸ ਵਿਕਲਪ ਦਿੱਤੇ ਜਾਣਗੇ। ਇੱਕ ਸਾਲ ਪੂਰਾ ਕਰਨ ‘ਤੇ ਸਰਟੀਫਿਕੇਟ, ਦੋ ਸਾਲਾਂ ਬਾਅਦ ਡਿਪਲੋਮਾ, ਤਿੰਨ ਸਾਲਾਂ ਬਾਅਦ ਡਿਗਰੀ ਅਤੇ ਚਾਰ ਸਾਲਾਂ ਬਾਅਦ ਆਨਰਜ਼ ਜਾਂ ਰਿਸਰਚ ਨਾਲ ਆਨਰਜ਼ ਡਿਗਰੀ ਮਿਲੇਗੀ।

ਇਸ ਅੰਡਰਗ੍ਰੈਜੂਏਟ ਕੋਰਸ ਵਿੱਚ ਕੁੱਲ 29 ਸੀਟਾਂ ਹਨ। ਇਸ ਤੋਂ ਇਲਾਵਾ 4 ਐਨਆਰਆਈ ਅਤੇ 1 ਵਿਦੇਸ਼ੀ ਵਿਦਿਆਰਥੀ ਲਈ ਸੀਟ ਰਾਖਵੀਂ ਹੈ। ਜਿਨ੍ਹਾਂ ਵਿਦਿਆਰਥੀਆਂ ਨੇ 12ਵੀਂ ਵਿੱਚ ਘੱਟੋ-ਘੱਟ 60 ਫੀਸਦੀ ਅੰਕ ਪ੍ਰਾਪਤ ਕੀਤੇ ਹਨ ਅਤੇ ਗਣਿਤ ਤੇ ਅੰਗਰੇਜ਼ੀ ਵਿਸ਼ੇ ਪੜ੍ਹੇ ਹਨ, ਉਹ ਅਰਜ਼ੀ ਦੇ ਸਕਦੇ ਹਨ। ਇਸ ਕੋਰਸ ਵਿੱਚ ਦਾਖਲਾ 12ਵੀਂ ਦੇ ਅੰਕਾਂ ਦੀ ਮੇਰਿਟ ਦੇ ਆਧਾਰ ‘ਤੇ ਕੀਤਾ ਜਾਵੇਗਾ।

ਉਮੀਦਵਾਰ ਵਧੇਰੇ ਜਾਣਕਾਰੀ ਲਈ ਪੰਜਾਬ ਯੂਨੀਵਰਸਿਟੀ ਦੇ ਅਰਥਸ਼ਾਸਤਰ ਵਿਭਾਗ ਅਤੇ ਪੀਯੂ-ਸੀਈਟੀ ਦੀ ਅਧਿਕਾਰਕ ਵੈੱਬਸਾਈਟ ‘ਤੇ ਜਾ ਸਕਦੇ ਹਨ।